भाग : २
विजय गोलांडे – न्यूज स्टेट सेवन
,.......................................................................
राज्यात जुलै सुरू झाला तरी अपेक्षित पाऊस न झाल्याने केवळ शेतीच नव्हे, तर पिण्याच्या पाण्याचाही गंभीर प्रश्न निर्माण होऊ लागला आहे. पुणे जिल्ह्यासह बारामती तालुक्यातील अनेक गावांमध्ये विहिरी, बोअरवेल, ओढे, नाले आणि लहान तलावांची पाणीपातळी झपाट्याने खालावत आहे. काही ठिकाणी जलस्रोत पूर्णपणे कोरडे पडण्याच्या मार्गावर असून ग्रामस्थांमध्ये भीतीचे वातावरण आहे.
दरवर्षी पावसाळ्याच्या सुरुवातीलाच तुडुंब भरून वाहणारे ओढे आणि तलाव यंदा ओसाड दिसत आहेत. अनेक गावांमध्ये पिण्याच्या पाण्याचा पुरवठा कमी करण्यात आला असून नागरिकांना पाणी जपून वापरण्याचे आवाहन केले जात आहे. परिस्थिती अशीच कायम राहिल्यास अनेक गावांना टँकरवर अवलंबून राहावे लागण्याची शक्यता व्यक्त केली जात आहे.
महिलांना आणि ज्येष्ठ नागरिकांना पाण्यासाठी लांब अंतर चालत जावे लागत असल्याची उदाहरणे समोर येत आहेत. काही ठिकाणी सकाळी लवकर पाण्यासाठी रांगा लागत असून पुरेसे पाणी मिळेल की नाही, याची चिंता प्रत्येक कुटुंबाला भेडसावत आहे.
पाण्याअभावी जनावरांनाही मोठा फटका बसत आहे. गुरांना पिण्यासाठी पुरेसे पाणी उपलब्ध नसल्याने पशुपालकांची चिंता वाढली आहे. अनेक ठिकाणी शेततळी आणि पाणवठे कोरडे पडल्यामुळे जनावरांना दूरवर नेऊन पाणी पाजावे लागत आहे.
हवामान खात्याने पुढील काही दिवस पावसाची शक्यता व्यक्त केली असली, तरी शेतकरी आणि ग्रामस्थांना आता दमदार व सलग पावसाची प्रतीक्षा आहे. अन्यथा पिण्याच्या पाण्याचे संकट अधिक तीव्र होण्याची भीती व्यक्त होत आहे.
उद्या भाग ३ : जनावरांचा घास हिरावला; चारा टंचाईने पशुपालक हवालदिल.
