न्यूज स्टेट सेवन प्रतिनिधी :
बारामती तालुक्यातील लोणी भापकर येथे शासनाच्या जनकल्याणकारी उपक्रमांतर्गत ‘छत्रपती शिवाजी महाराज महसूल समाधान शिबिर अभियान – टप्पा क्रमांक २’ चे आयोजन करण्यात आले आहे. बुधवार, १४ मे २०२५ रोजी न्यू इंग्लिश मीडियम स्कूल, लोणी भापकर येथे सकाळी १० ते सायंकाळी ५ या वेळेत हे शिबिर पार पडणार असून, गाव व परिसरातील नागरिकांना विविध शासकीय सेवांचा लाभ एकाच ठिकाणी उपलब्ध होणार आहे.
या शिबिराच्या माध्यमातून महसूल विभाग, पुरवठा विभाग, कृषी विभाग, ग्रामविकास विभाग, आधार संबंधित सेवा, पोस्ट ऑफिस सेवा तसेच विविध दाखले व कागदपत्रांशी संबंधित कामे तत्परतेने करून देण्यात येणार आहेत. शासनाच्या विविध योजनांचा लाभ मिळवण्यासाठी आवश्यक कागदपत्रे, अर्ज, दाखले, नोंदी, दुरुस्त्या आणि मार्गदर्शन यासाठी नागरिकांना वेगवेगळ्या कार्यालयांचे फेरे मारावे लागू नयेत, या उद्देशाने या शिबिराचे आयोजन करण्यात आले आहे.
महसूल विभागामार्फत उत्पन्न दाखला, रहिवासी दाखला, जात प्रमाणपत्र, ७/१२ उतारा, फेरफार आदी कामे केली जाणार आहेत. पुरवठा विभागाकडून रेशन कार्ड संदर्भातील विविध सेवा उपलब्ध राहतील. कृषी विभागाकडून शेतकऱ्यांना योजनांची माहिती, अनुदानासंबंधी मार्गदर्शन व अर्ज प्रक्रिया करण्यात मदत केली जाणार आहे. ग्रामविकास विभागाकडून विविध ग्रामपंचायत योजनांबाबत माहिती व सेवा दिल्या जातील. तसेच आधार कार्ड अद्ययावत करणे, दुरुस्ती करणे आणि पोस्ट ऑफिसच्या विविध सेवाही नागरिकांसाठी उपलब्ध राहतील.
शासनाच्या सेवा गावपातळीवर आणि सर्वसामान्यांच्या दारात पोहोचविण्याच्या उद्देशाने राबविण्यात येत असलेल्या या उपक्रमामुळे नागरिकांचा वेळ, पैसा आणि श्रम वाचणार आहेत. विशेषतः शेतकरी, ज्येष्ठ नागरिक, महिला, विद्यार्थी आणि सर्वसामान्य ग्रामस्थांना या शिबिराचा मोठा लाभ होणार आहे.
गावातील सर्व नागरिकांनी आवश्यक कागदपत्रांसह शिबिरास उपस्थित राहून विविध शासकीय सेवांचा लाभ घ्यावा, असे आवाहन संबंधित प्रशासनाकडून करण्यात आले आहे. शासनाच्या सेवा लोकांपर्यंत प्रभावीपणे पोहोचविण्यासाठी अशा प्रकारची शिबिरे अत्यंत उपयुक्त ठरत असून, लोणी भापकर परिसरातील नागरिकांनी या संधीचा जास्तीत जास्त लाभ घ्यावा, असेही प्रशासनाने स्पष्ट केले आहे.
.........
