बारामती तालुक्यातील लोणी भापकर येथे गावाच्या समस्यांवर प्रकाश टाकण्यासाठी ॲनिमिया मुक्त गाव अभियान कार्यक्रमात ग्रामपंचायत कार्यालयात गटविकास अधिकाऱ्यांसमोर उभा राहिलेल्या तरुणाला ग्रामसेविकेने "तुला कानशिलात मारीन" अशा म्हटल्याने गावाच्या विकासाचा आवाज उठवणाऱ्या युवकाचा अपमान झाल्याने ग्रामसेविकेवर शिस्तभंगाची कारवाई करावी यासाठी ग्रामपंचायत कार्यालया समोर मनोज साठे या तरुणाने धरणे आंदोलन सुरु केले आहे.
युवकाने या झालेल्या प्रकाराची माहिती मुख्य कार्यकारी अधिकारी (जि.प. पुणे), गटविकास अधिकारी (पं.स. बारामती) आणि पोलीस प्रशासन यांना लेखी तक्रार सादर केली असून, ग्रामसेविकेवर तात्काळ शिस्तभंगाची व निलंबनाची मागणी केली होती. परंतु कोणतीच कारवाई न झाल्याने आपण हे आंदोलन सुरु केल्याचे मनोज साठे यांनी न्यूज स्टेट 7 शी बोलताना सांगितले.
मीं विचारलेल्या सरळ प्रश्नाने चिडलेल्या ग्रामसेविकेने "तुला कानशिलात मारीन" इथून निघून जा अशा प्रकारचे दबावाचे सूर काढल्याचा गंभीर आरोप साठे यांनी केला आहे. लोकशाहीच्या मंदिरातच मानहानी झाल्याने मीं अपमानित होऊन मला खोलवर जखमा झाल्या आहेत.
अपमानाचा ठसा मनावर घेत युवकाने आंदोलनाची ठाम भूमिका घेतली आहे
"न्याय मिळेपर्यंत संघर्ष सोडणार नाही!"
प्रशासनाने योग्य पाऊल न उचलल्यास बुधवार दि. 26 नोव्हेंबर पासून ग्रामपंचायत कार्यालयासमोर सुरु असलेले थेट धरणे आंदोलन बेमुदत करण्याचा निर्धार करून तातडीचा इशारा दिला आहे. गावात वातावरण तापले असून, अन्यायाविरोधात आवाज उठवणाऱ्या तरुणाला मोठ्या प्रमाणावर ग्रामस्थ, सामाजिक संघटना, तरुण कार्यकर्ते यांचा पाठिंबा पाठिंबा मिळू लागल्याचे मनोज साठे यांनी सांगितले.
दरम्यान माहिती अधिकार व सामाजिक कार्यकर्ते विक्रम कोकरे यांनी आंदोलन स्थळी भेट देऊन ग्रामसेविकेने चुकीचे वर्तन केले असून अशा प्रकारची गर्वर्तणूक होऊ नये व त्यांनी केलेल्या चुकीच्या वर्तनाबद्दल त्यांच्यावर कारवाई झालीच पाहिजे असे कोकरे यांनी सांगितले.
याबाबत ग्रामसेविका उज्वला शिंगाडे यांच्याशी संपर्क साधला असता त्यांनी सांगितले की, मनोज साठे यांनी मला सातत्याने 2023 पासून चुकीच्या पद्धतीने त्रास देण्याचे काम केले आहे. सोशल मीडियावर मला अपमानित करण्यासाठी अनेक प्रकारच्या पोस्ट टाकून मला बदनाम करत आहे. या संदर्भात गावच्या पोलीस पाटील व पोलीस प्रशासनाकडून त्यांना समज देऊन माझी बदनामी व त्रास देण्याचे काम थांबवावे असे कळवले होते परंतु हा युवक थांबायला तयार नाही. याबाबतचे सर्व पुरावे माझ्याकडे असून याबाबत मी वरिष्ठांशी पत्र व्यवहार केला आहे. मी कुठलेही गैरवर्तन केले नसुन मीं त्यांना समजवण्याचा प्रयत्न केला आहे. उलट मला तुम्ही बाथरूमला कुठे जाता असे प्रश्न विचारत आहे. त्यामुळे मी या गावात असुरक्षित असून मलाही संरक्षण मिळावे असे त्यांनी सांगितले.
