लोणी भापकर, ता. बारामती : माळवाडी (लोणी) येथील गट क्रमांक ७५५ मध्ये रविवारी (दि. २ ऑगस्ट २०२६) दुपारी साडेचारच्या सुमारास आलेल्या अवकाळी वादळ व जोरदार वाऱ्यामुळे मोठी दुर्घटना घडली. जुन्या व बंद असलेल्या हॉटेलसमोरील पत्र्याचे शेड अचानक कोसळल्याने त्याखाली आसरा घेतलेल्या चार शेळीपालकांपैकी नंदाबाई जनार्दन लडकत (वय ६२, रा. माळवाडी - लडकत मळा) यांचा जागीच मृत्यू झाला. या दुर्घटनेत अन्य तिघेजण जखमी झाले असून मोठ्या प्रमाणात पशुधनाचीही हानी झाली आहे.
जखमींमध्ये बाळासो अमृता लडकत (वय ७०), प्रल्हाद पांडुरंग लडकत (वय ६५) व मंदा प्रताप फरांदे (वय ५९) यांचा समावेश आहे. या दुर्घटनेत शेळ्या, मेंढ्या व बोकड यांच्यावरही शेड कोसळल्याने मोठे नुकसान झाले.
पंचनाम्यानुसार मंदा प्रताप फरांदे यांच्या २ मेंढ्या व १ शेळी, बाळासो अमृता लडकत यांच्या १ मेंढी व १ बोकड, प्रल्हाद पांडुरंग लडकत यांच्या ४ मेंढ्या तर नंदाबाई जनार्दन लडकत यांच्या २ शेळ्या मृत्युमुखी पडल्या. अशा प्रकारे एकूण ११ शेळ्या, मेंढ्या व बोकड दगावले, तर १० जनावरे जखमी झाली आहेत.
दरम्यान, दुर्घटनेत मृत्युमुखी पडलेल्या नंदाबाई जनार्दन लडकत या माळवाडी-लोणीच्या सरपंच मंजूताई दीपक लडकत यांच्या सासूबाई होत. त्यांच्या निधनामुळे परिसरात हळहळ व्यक्त होत असून लडकत कुटुंबावर दुःखाचा डोंगर कोसळला आहे.
........
