जिल्हा परिषदेच्या निवडणुकीच्या रणधुमाळीत अचानक कोसळलेली एक बातमी… आणि संपूर्ण महाराष्ट्र सुन्न झाला. राज्याचे उपमुख्यमंत्री, लाखो कार्यकर्त्यांचा आधार आणि ग्रामीण जनतेचा आवाज असलेले अजित पवार अपघातात आपल्यातून निघून गेले—आणि राजकारण क्षणात थांबले, पण शोक मात्र प्रत्येक घरात पसरला.
रस्ते ओस पडले, प्रचाराचे फलक न बोलके झाले, घोषणा शांत झाल्या. मात्र लोकांच्या मनात उसळलेली वेदना आणि कृतज्ञता कुणीही थांबवू शकले नाही. त्या भावनांचाच प्रत्यय पुणे जिल्हा परिषद निवडणुकीत आला, जिथे राष्ट्रवादी काँग्रेसने ७३ पैकी ५१ जागांवर विजय मिळवत एकहाती सत्ता मिळवली. हा विजय राजकीय नव्हता. तो प्रेमाचा, ऋणनिर्देशाचा आणि अश्रूंनी लिहिलेला जनादेश होता.
अजित पवार म्हणजे फक्त नेता नव्हता; ते अनेक गावांसाठी पाणी आणणारा माणूस, शेतकऱ्यांच्या व्यथा ऐकणारा आवाज, सहकाराला उभारी देणारा कणा होते. “दादा आमच्या दारात आले होते,” “आमच्या विहिरीला पाणी दिलं होतं,” “रस्ता त्यांच्या निर्णयामुळे झाला” अशा आठवणी प्रत्येक गावात डोळे पाणावून सांगितल्या जात होत्या.
मतदानाच्या दिवशी चित्र वेगळंच होतं. काही मतदान केंद्रांवर वृद्ध मतदार हात जोडून उभे होते. कुणी मत टाकण्याआधी डोळे पुसले, कुणी मनातल्या मनात नाव घेतलं. “हे मत विकासासाठी नाही, हे मत आठवणींसाठी आहे,” असं एका वृद्ध शेतकऱ्याचं वाक्य सगळं सांगून गेलं. तरुण पिढीनेही मौनातच निर्णय दिला. नेता गेला, पण त्यांनी दाखवलेली दिशा आम्ही सोडणार नाही.
निकालाच्या दिवशी जल्लोष नव्हता. फटाके नव्हते. फक्त डोळ्यांत पाणी आणि मनात जडपणा होता. कार्यकर्ते एकमेकांना मिठी मारत होते.आनंदासाठी नाही, तर वेदना वाटून घेण्यासाठी. विजयाच्या आकड्यांतही शोकाची छाया स्पष्ट दिसत होती.
राजकीय जाणकार सांगतात, हा कौल सहानुभूतीचा नाही, तो विश्वासाचा आहे. अजित पवार यांनी उभ्या केलेल्या विकासाच्या पायावर उभा राहून जनतेने सांगितलं आहे की, माणूस जातो, पण त्याने दिलेली आश्वासनं आणि कामाची ठसठशीत पावलं मागे राहत नाहीत.
आज पुणे जिल्हा परिषदेत राष्ट्रवादी काँग्रेस सत्तेत आहे. पण त्या सत्तेच्या प्रत्येक फाईलमध्ये, प्रत्येक निर्णयात, प्रत्येक स्वाक्षरीत एकच भावना असेल
“दादा तुम्ही आज आमच्यात नाही, पण आम्ही तुमच्यामुळे इथे आहोत.
पुणे जिल्हा परिषदेत निवडून आलेल्या जागा पक्षीय बलाबल :- राष्ट्रवादी काँग्रेस - 51, भाजप - 10, शिवसेना ठाकरे गट - 6, शिवसेना शिंदे गट - 5, राष्ट्रवादी काँग्रेस (शरद पवार ) - 1.
........
