बारामती तालुक्यातील लोणी भापकर ग्रामपंचायतीच्या ग्रामसेविकेने तरुण युवकांवर केलेल्या कथित
दमदाटी प्रकरणात प्रशासनाने कोणताही ठोस निर्णय न घेतल्याने आंदोलनकर्त्यांचे धरणे आंदोलन तिसऱ्या दिवशीही कायम आहे. ग्रामसेविकेची बदली करावी, निलंबनाची कारवाई करावी, किंवा किमान आरोप निश्चित करून कारणे दाखवा नोटीस बजावावी, या मागण्यांवर ठाम भूमिका घेत आंदोलनकर्त्यांनी प्रशासनावर कडक शब्दांत हल्ला चढवला आहे.
धरणे आंदोलन स्थळी सकाळपासूनच मोठी गर्दी उसळली असून संतप्त युवकांनी ग्रामसेविकेविरोधात घोषणाबाजी केली. कारवाईशिवाय मागे हटणार नाही. अशा भूमिकेमुळे गावातील वातावरण तापले आहे.
दरम्यान, परिस्थिती समजून घेण्यासाठी पंचायत समितीचे विस्तार अधिकारी भिमराव भागवत आज धरणेस्थळी दाखल झाले. त्यांनी आंदोलनकर्त्यांना चर्चा करून मागे हटण्याचे आवाहन केले. मात्र, कोणतीही स्पष्ट हमी न मिळाल्याने चर्चा निष्फळ ठरली आणि आंदोलनकर्त्यांनी आंदोलन सुरूच ठेवण्याचा निर्णय जाहीर केला.
आंदोलन मोडण्यासाठी पोलिस हवालदार तौसिफ़ मणेरी दबाव टाकत असल्याचा गंभीर आरोपही आंदोलनकर्त्यांनी केला असून त्यामुळे वातावरण आणखी तणावपूर्ण बनले आहे.
तोडगा न निघाल्यास आंदोलन अधिक तीव्र करण्याचा इशारा देत आंदोलनकर्त्यांनी प्रशासनाला धारेवर धरले असून उद्यापासून आंदोलनाला नवे वळण मिळण्याची चिन्हं दिसत आहेत.
यावेळी भाजपचे अनुसूचित जाती मोर्चा पुणे जिल्हाध्यक्ष मयूर कांबळे, पुणे जिल्हा उपाध्यक्ष सुनील जांगडे, सरचिटणीस अनुसूचित जाती मोर्चा पुणे जिल्हा रवी साळवे, अनुसूचित जाती मोर्चा पुणे जिल्हा चिटणीस निखिल आढळगे, प्रहार संघटनेचे रोहित भालेकर, सामाजिक कार्यकर्ते विक्रम कोकरे, नीरा मार्केट कमिटीचे माजी सभापती भाऊसाहेब कांबळे, रवींद्र भापकर, संदीप पवार, श्रीकांत भापकर, उदयसिंह भापकर, नंदकुमार मदने, विजय बारवकर, नवनाथ भापकर, पोलीस हवालदार तौसिफ मणेरी, लोणी भापकरचे पोलीस पाटील संजय गोलांडे, मासाळवाडीचे पोलीस पाटील सुभाष ठोंबरे, दादा कडाळे तसेच गावातील ग्रामस्थ आंदोलनस्थळी उपस्थित होते.
...................
