विशेष म्हणजे माजी मंत्री बबनराव पाचपुते व विद्यमान आमदार विक्रमसिंह पाचपुते यांना टक्कर देण्यासाठी अनेक विरोधकही आता अजितदादांच्या छत्राखाली आले आहेत. त्यामुळे श्रीगोंद्यातील राजकीय समीकरणांमध्ये मोठी उलथापालथ झाल्याचे चित्र दिसत आहे. अजित पवार गटाच्या राष्ट्रवादी काँग्रेसची धुरा शिवाजीराव नागवडे कारखान्याचे चेअरमन राजेंद्र नागवडे, माजी आमदार राहुल जगताप, घनश्याम शेलार, बाळासाहेब नहाटा, दत्तात्रय पानसरे, अण्णासाहेब शेलार तसेच भगवानराव पाचपुते हे नेते सांभाळणार आहेत, स्थानिक पातळीवर पक्ष संघटन मजबूत करण्यासाठी विविध कार्यकत्यांना जबाबदाऱ्या वाटप करण्यात आल्या आहेत. श्रीगोंदा शहराची जबाबदारी घनश्याम शेलार यांच्याकडे देण्यात आली असून मांडवगण, कोळगाव आणि वेळपणे या जिल्हा परिषद गटांची जबाबदारी माजी आमदार राहुल जगताप यांच्याकडे देण्यात आली आहे. तर आढळगाव, बेलबंडीआणि काष्टी या गटांची धुरा राजेंद्र नागवडे, अण्णासाहेब शेलार बाळासाहेब नाहाटा यांच्या हाती देण्यात आली आहे. या नव्या राजकीय रचनेमुळे तालुक्यातील इतर गटांना फटका बसण्याची शक्यता राजकीय वर्तुळात व्यक्त केली जात आहे. दरम्यान आगामी नगरपरिषद निवडणुकीच्या पार्श्वभूमीवर श्रीगोंद्यात राजकीय वातावरण चांगलेच तापले आहे. नगराध्यक्षपद एकच, दावेदार मात्र अनेक अशी परिस्थिती निर्माण झाली असून या पदासाठी अनेक दिग्गज नेते मैदानात उतरल्याने नवीन चेहरे आणि तरुण कार्यकर्ते नाराज झाले आहेत. शहरातील विविध प्रभागांमध्ये बैठका, जनसंपर्क मोहिमा आणि विकासाच्या आश्वासनांची मालिका सुरु झाली आहे. पाणीपुरवठा, रस्ते, वीज, आरोग्य यांसारख्या मूलभूत प्रश्नांवर मतदारांचे लक्ष केंद्रीत असून नागरिकांना पारदर्शक व विकासाभिमुख नेतृत्व अपेक्षित असल्याचे बोलले जात आहे. पक्षांतर्गत बैठकांनंतर उमेद‌वारांची नावे जाहीर होण्याची शक्यता असून सध्या तरी श्रीगोंद्यातील राजकारणात एकच पद दावेदार अनेक! अशीच स्थिती आहे. त्यामुळे श्रीगोंद्यातील ही निवडणूक रंगतदार आणि आचंबीत करणारी होणार असे संकेत राजकीय वर्तुळात दिले जात आहेत.
